初度遊

初度遊

集數

旅遊達人就見得多,從未去過旅行嘅人上旅遊節目你見過未?「初度遊」揾嚟三位旅遊新鮮人,獻出佢地論盡嘅第一次,包括迷路、被昆、碰釘、搭錯車、帶漏野,無所適從、無奇不有!當睇見佢地嘅烏龍與無助,又會否令你諗起自己嘅第一次?

三位從未出遊過的人,三個完全陌生的城市,三種體驗,讓觀衆重新領略旅遊意義,即使迷途,也是最好的風景。

阿楓膽粗粗帶阿媽去游歷有法國小鎮之稱嘅巴拿山,轉頭又走入越南占婆皇朝嘅遺址美山聖地;仲要睇埋越南style大戲,又去會安古城泛舟河上放水燈…… 行程安排得甘豐富,其實唔知阿媽攰唔攰嘅呢?

話說阿楓帶繼續阿媽喺會安古城嘆咖啡、踩單車,享受慢活人生,做為一個從未有旅遊經驗嘅後生仔嚟講,阿楓都算非常懂得抓住旅游嘅脈搏;但話口未完,阿楓又是整蠱阿媽,搞到阿媽又喊又笑,究竟搞邊科?

阿楓人生嘅第一次旅行黎到尾聲,深度感受另類越南風情,坐越南竹筒船出海捕魚,玩到嘔都係濕濕碎, 甘玩法真係充分表現到香港人去旅行去到盡嘅精髓。旅程終結時,回顧新奇開心嘅人生第一次,兩母子又有咩肺腑之言?

70歲嘅洪叔獻出人生珍貴嘅第一次,為左探望見闊別30年嘅家姐,所以鼓起勇氣隻身踏上旅程勇闖英國!第一次踏足陌生嘅國土、第一次擁抱30年冇見嘅家姐、第一次喺曼徹斯特嘅街頭食洋腸,洪叔嘅勇氣唔知有冇感動到你呢?

旅行嘅意義就係要離開自己嘅comfort zone,勇敢探索新事物。完全唔識英文嘅洪叔自己睇住地圖,用中文問路,再搭公共交通工具去目的地景點探索,真心覺得佢勁。而洪叔遠在香港嘅女敏芝都話要比個驚喜老竇以表示支持同鼓勵!

今集人生路不熟嘅洪叔將會比個親生女賣豬仔?!敏芝首先帶洪叔去嘆個English Breakfast ,跟住仲要帶佢去滑雪,轉頭竟然將洪叔從英國賣豬仔去法國!究竟發生咩事,難爲洪叔仲完全被蒙在鼓裏,唔知自己身在何處。

洪叔遊覽法國嘅夢想一夜之間成真,仲體驗左人生最開心嘅一天,為佢嘅初度遊畫上完美句號。另一邊廂,從未去過旅行嘅Tony整裝待發,夢想成真地去日本旅行,並打算突破佢人生好多好多嘅第一次!

上一集Tony未出發就為自己定下6大目標,今集Tony終於踏足日本,首先迷完一輪日本地鐵,跟住嚟到黑門市場就打開個胃,不斷食食食;但喺日本嘆左成日美食嘅Tony突然home sick, 掛住喺香港嘅媽媽。

今集Tony喺日本食另類好西,完全被女女包圍,又採耳瞓大髀、又去女僕café一齊學貓叫,真係開心死佢。未去過旅行,又未拍過拖嘅佢,今次竟然可以拖到女僕嘅手仔,真係夢想成真呀!

今集Tony從大阪搭火車去京都,仲好威風咁換曬和服周圍聊靚女合照,非常春風得意。但鏡頭一轉,Tony突然失控爆喊,仲要被節目監製訓斥一番?!究竟發生咩事?

風雨過去,天氣再次放晴,上一集Tony失控爆喊,今集佢剖白左自己童年不快嘅遭遇後,重新振作,以一個全新嘅姿態再次踏上旅途,並真心誠意同一個日本家庭共度旅程最後嘅一天,為整個旅程畫上完美句號。