-
E359中古發燒友 (I)
新不如舊？今集四位嘉賓就同觀眾分享就算中古歷史嘅產物，都可以係寶！而佢哋珍藏嘅物品，亦分分鐘比本人年紀更大！究竟咩嘢原因令佢哋入坑？中古對佢哋嚟說又有乜魅力？
-
E360中古發燒友 (II)
作為中古發燒友，四位嘉賓鍾意到要開間舖放心頭好！佢哋大談入貨秘訣，但即使經驗豐富，亦難免曾經受騙！所以佢哋一樣試過買到「甩皮甩骨」嘅中古貨，更有人試過買到假貨！
-
E361紥肚師 (I)
究竟紥肚師嘅工作係乜嘢？紥肚又係唔係只供產後媽媽減肥之用？今集將會揭開呢行嘅神秘面紗！四位嘉賓分享原來呢個行業「性價比」極高，其中兩位老行尊憶述幾年前佢哋入行，原來只係上咗兩日堂，而接一個客人已經抵銷晒學費。
-
E362紥肚師 (II)
四位嘉賓分別係兩位老行尊同兩位新手紥肚師，但無論任職幾耐，佢哋都有同樣嘅體會 – 就係對於同行嘅操守有啲反感 ; 有人「頂爛市 」，亦有人幫客人影紥肚前後對比圖，用「P圖」令人誤以為有極大效果！
-
E363網絡內容創作者 (I)
社交平台爆紅專頁有好多，睇少個都好似跟唔上潮流，同人傾偈都搭唔到嘴！但係呢啲專頁係由咩人經營？一班素人又點靠自己創造網絡潮流？今集有4位網絡內容創作者做嘉賓，為大家解構社交平台世界係點樣運作，同埋佢哋嘅經營之道！到底經營專頁有無錢賺？
-
E364網絡內容創作者 (II)
要成功令一個社交平台專頁彈起，除咗要靠創意，仲要識玩網絡「潛規則」，四位嘉賓同大家拆解 Like 數多少並唔係靠彩數！佢哋仲會大爆網民各種瘋狂行為同埋經營社交平台嘅各種辛酸，並且分享佢哋同追縱者嘅互動，當中竟然有人做埋「月老」幫手牽紅線！
-
E365攝影記者 (I)
對比起文字記者需要採訪同撰寫新聞，攝影記者畀人嘅感覺可能只限於識影相就得，不過攝記嘅工作並唔係想像中咁輕鬆，佢哋為咗完成一單新聞，可以搏到幾盡，換嚟自己自豪嘅作品？
-
E366攝影記者 (II)
為咗要影到同其他行家唔一樣嘅相，或者做到一單獨家新聞，攝記背後要付出幾多時間同勞力，甚至隨時有畀人打嘅風險？另外大家以為攝記影相要影到受訪者靚一靚，但竟然有攝記反而追求越醜越收貨？
-
E367渠務公司職員 (I)
好多人對「渠王」有一種莫名嘅幻想: 例如，大家會想像「渠王」就係「大隻型男」！今集邀請咗四位渠務公司職員，一探「渠王」嘅秘密！其實「渠王」真正負責啲咩嘢工作？
-
E368渠務公司職員 (II)
渠王們繼續大爆料！佢哋話唔少行內人都會報大數，收得特別貴，亦都有人初入行唔識規矩「頂爛市」！而令佢哋覺得最辛酸嘅事，並唔係畀屎淋，而係驚女友或者太太嬲，因為呢行要隨傳隨到，根本無辦法成日陪伴對方。
-
E369註冊中醫 (I)
一講中醫你會諗起好臭嘅中藥？好噏耷嘅診所？定係又惡又逼你戒口嘅老醫師？呢啲諗法就過晒時喇！今集有4位註冊中醫師上嚟做嘉賓，同大家拆解對於中醫同中藥嘅迷思與誤解，仲親自公開佢哋嘅「成醫之路」！究竟做一位中醫師要識幾多嘢？
-
E370註冊中醫 (II)
4位中醫師嘉賓都行醫多年，遇過唔少奇難雜症，但原來真實嘅奇難雜症係超乎想像咁誇張！有人飲凍嘢飲到房事不順，仲慘過男人最痛；有人經歷創傷執返條命，但係從此行動不便，到底醫師們點樣輔助佢哋「重獲新生」？
-
E371網絡食評家 (I)
網絡上愈來愈多網絡食評家，今次我哋就誠邀咗三位上嚟，分享佢哋點樣可以突圍而出，同時一樣係畀食評，究竟佢哋覺得自己有無資格媲美上一代美食家？而佢哋亦都會分享點樣經營自已嘅社交網絡，同埋寫食評賺錢嘅方法。
-
E372網絡食評家 (II)
三位網絡食評家今集分享更多嘅難忘經歷; 例如: 其中一位嘉賓就試過買海鮮攞去酒樓加工，對方竟然偷龍轉鳳換走原本食材，仲要幾分鐘就上菜，勁荒謬！
-
E373香港棒球代表 (I)
香港原來都有人打棒球？唔係電影，唔係動漫，而係真真正正嘅香港棒球運動員！今集請嚟4位香港棒球代表同大家揭開本地棒球嘅「神秘面紗」，大爆香港地做棒球運動員嘅非常人等級秘辛！唔只場地變「劏場」、幾乎無人做到全職，仲要攞晒獎都無人講！
-
E374香港棒球代表 (II)
上集講完秘辛，今集4位當然有香港棒球代表嘅熱血故事！訓練刻苦係常識，跑到嘔先係常態，但係跑到感動流涕、攬埋一舊痛哭就簡直係匪夷所思！仲要幾經辛苦打到入亞運，都要畀觀眾噓爆？
-
E375精神病患與相關人士 (I)
近日香港出現咗唔少斬人事件，傳媒都將案件發生嘅原因，歸究主人翁疑似患有精神病。今集邀請咗四位同精神病有關嘅人士，一齊探討社會嘅情緒問題，究竟患上精神病多年嘅病患、精神科專科醫生、臨床心理學家、精神復康訓練員，聽到新聞之後有乜感受？
-
E376精神病患與相關人士 (II)
今集繼續探討香港人情緒問題，精神病患、精神科專科醫生、臨床心理學家、精神復康訓練員各自有咩心酸？以佢哋嘅經驗，精神病患搵工會唔會有困難？原來大部份患者見工都不會提及自己嘅健康狀況，因為怕受到歧視！
-
E377興趣班導師 (I)
香港家長任何時候都要安排仔女學嘢，連暑假都唔例外！以為咁就會造就唔少賺錢機會畀一眾興趣班導師？原來暑假嘅班多得嚟唔係特別賺得多，仲反而會畀中介公司食一筆！
-
E378興趣班導師 (II)
今集4位嘉賓會繼續大爆各種怪獸家長同學生嘅瘋狂事蹟！例如要面對自己個仔一定係絕世神童嘅極品家長、白鴿眼兼奄尖腥悶嘅貴婦家長，仲有各色各樣嘅超級曳曳豬！每個都獨當一面，世界級惡頂！到底各位導師如何招架？家長定學生最難應付？
-
E379水上活動工作者 (I)
天時暑熱，又到咗出海玩水上活動嘅日子，未諗到想玩啲咩？一於聽吓今日3位從事唔同水上活動嘅工作者，分享佢哋行業嘅不同事，究竟做呢行嘅收入係咪咁可觀，旺季淡季可以差幾遠？ 佢哋仲會解答「從事水上活動嘅人係為咗𥄫女或者易啲識女仔」等等迷思。
-
E380水上活動工作者 (II)
水上活動工作者最佳搵錢時機就係夏天，偏偏期間撞正農曆七月，唔少人都可能會避免落水，對於水上活動工作者嚟講有冇實際嘅影響？而喺夏天呢段期間，個個紛紛出動去玩水，受歡迎嘅海域係咪會變成第二個旺角？
-
E381大型犬隻主人 (I)
可能今次係史上最多嘉賓嘅主題，除咗四位養大狗嘅主人，仲有四隻「加加加大碼」嘅狗仔登場，包括兩隻超過30公斤嘅標準貴婦狗、40公斤嘅藏獒，仲有成年後體重高達90公斤，而家就70幾公斤嘅俄羅斯高加索犬！
-
E382大型犬隻主人 (II)
今集繼續有得意狗仔陪住大家！主人分享因為養大狗而畀人白眼嘅情況，好似因為狗仔嘅高度會唔少心掂到人哋隻手，就試過嚇親對方要佢拉好隻狗; 又試過有路人，聲稱會劏咗隻狗嚟食！？
-
E383輪椅使用者 (I)
今集請嚟四位輪椅使用者，有人天生患病要坐輪椅，亦有嘉賓因為後天患病，隱閉咗成年先接受到日後與輪椅同存嘅事實，仲好積極咁面對生活！佢哋亦講到讀書趣事，話特殊學校有好多斜路，火警演習嗰陣，所有同學啲輪椅全部會加快，全部人好似玩緊賽車咁！
-
E384輪椅使用者 (II)
今集嘉賓繼續大呻辛酸事; 佢哋話平時出街畀人由頭望到落腳就已經係日常，有啲人仲會好似「睇車展」咁望到佢架車實，亦都遇過唔少「好心做壞事」嘅市民，有嘉賓行超市，叫個途人幫手拎件放喺高層嘅貨，之後個途人主動跟住佢行勻成個超市…
