旅行吊靴鬼 - 日本

旅行吊靴鬼 - 日本

集數

旅行有好多方法,無論hea定癲,都係由自己籌劃,一力承擔。不過今次旅行,完全被動。每日主持都會搵一組當地旅行的香港人,佢地可能係單飛、情侶、幾個大男孩、一家人,跟住佢地的行程一日遊,吊靴鬼咁黐住人,主持完全唔知去邊、完全被動。當中可能會舊地重遊、或者發現新大陸。不過最好玩嘅係窺探旅行者的關係及行為。

初到奈良

啱啱到達大阪嘅女主持Renee ,食足成晚檸檬都搵唔到目標團友;好彩最後有驚無險,有4位少男少女願意收留佢呢個新團友。跟住一對情侶加兩粒電燈膽去奈良,Renee呢個第五者又會帶嚟乜嘢化學作用呢?

再到奈良

吸收完日本日月精華嘅Renee,得到超能力 : 「開口中」;呢頭講完好鍾意鹿仔同埋想去行街買嘢,果頭就俾佢撞正去奈良同埋心齋橋嘅新團友。吊靴鬼Renee出發前滿心歡喜,結果夜晚佢差啲喊出嚟。

又到宇治

短短兩集就經歷曬高山低谷嘅Renee,第三日嘅吊靴鬼之旅依然係過山車急上急落,俾佢跟到個啱曬咀形嘅新團友,偏偏目的地又係第一日去過嘅宇治。但世事就係咁奇妙, 一樣嘅地方, 一樣嘅餐廳,唔同嘅團友原來有天與地嘅分別。

馬拉松與日落

日日做到無停手,Renee又想偷懶唔搵團友,諗咗條屎橋,去大阪馬拉松會場搵香港跑手做團友,結果跟住一對馬拉松夫婦。。。你估行路辛苦啲定跑步辛苦啲?好彩跑完半日,導演有位DJ朋友晌附近遊船河,等Renee做返半日齋坐嘅吊靴鬼。

登高賞紅葉

命苦嘅吊靴鬼Renee,掃完貨、跑完步、落完海,今次就要上山。跟住另一位馬拉松男選手, 上去神戶海拔700嘅六甲山賞紅葉,再落返神戶港睇日落。聽落呢位團友好有計劃,行程又詩情畫意;不過講到明Renee命苦,過程又點會咁簡單。

轉戰京都

「六天,日本。。。」足夠嚇到Renee唔敢再嚟旅行。住晌大阪就日日撲去京都、奈良、神戶,出師不利嘅Renee決定轉轉運氣,將大本營改去京都,嚟個搬家轉運。 結果, 今集成為Renee過得最開心嘅一日。

嵐山嵯峨野

搬屋轉運果然有效,之前要跪地搵團友,今集竟然有幾位淑女主動埋身,仲要聲稱有睇過Renee嘅節目。江湖傳聞,有睇viutv節目嘅都係賢良淑德嘅好女人;有呢5位有品味嘅淑女同型男帶去嵐山,吊靴鬼Renee簡直係萬千寵愛在一身。

清水寺

捱咗八日終於苦盡甘來,有媽的孩子像個寶,Renee發現對住同年紀嘅團友做吊靴鬼太辛苦,跟住成熟穩重嘅團友最爽皮。上天好聽話咁派咗一個文質彬彬嘅男粉絲,晌地鐵偶遇Renee,然後一家3口帶埋Renee去玩,仲照顧到無微不至。

廢墟攝影

故事要由第一日嚟到大阪講起, Renee晌機場其實搵到兩位型男,種咗八日嘅種子今日開花結果, 佢地今日就帶埋吊鬼去神戶影廢墟。神戶有牛你就聽得多,神戶有廢墟咁神秘你就千祈唔好錯過。

回味無窮

十日嘅京阪神吊靴鬼之旅,遇過唔同類型嘅香港旅客,去過唔同嘅地方,有完全唔同嘅旅行方式;呢種不由自主嘅旅行模式究竟過唔過癮,邊幾位團友又最令Renee難忘呢?

更多類似影片

演員及製作班底