財經 Top Search

財經 Top Search

集數

港股中午收市前,會運用不同來源專業數據,分析熱門搜尋及市場最關注股份同話題,助你作出貼市投資部署。!

中美商務部部長再通電話,加上央視報道,喺疫情下港口一箱難求,令貨櫃價格大升,航運股今日顯著造好,其中以中遠海控最搶鏡,中信建投(06066)估計,中遠海控今年收入及淨利潤,分別增長65%及近7倍,最新目標價睇38元...

普拉達獲花旗「加持」,上調升目標價17%至55元,今朝已經「到價」兼升凸,一度衝上逾7年高位。

周末期間,湖北省十堰市發生天然氣爆炸,市傳係中燃同另一間公司合營,事件拖冧中燃股價,一度插穿25元,公司喺10點後更突然宣布停牌,停牌前報25.3元,跌逾14%。大和資本更踩多腳,將中燃評級由「跑嬴大市」降至「持有」。

金價噚晚向下,繼續1個月收市新低,加上擔心美國加息,同埋聯儲局「收水」,一向對金價敏感度最高嘅紫金,股價今日大跌。金價回落拖低埋銀、銅、鐵價格,係咪代表呢輪依浪升勢完結?

融創連續第2日上榜,美國加息日程有機會提前,美國債息顯著反彈,令持有美元企業債券嘅公司負擔更大,而融創一批2026年到期嘅美元債券價格跌勢加劇,有機會創兩個月最大單日跌幅。

內房股今日普遍受壓,其中融創一度跌逾7%,喺「三條紅線」政策下,融創仍加快增加土地儲備,令市場更加擔心融創嘅財務狀況可能惡化。

隨著中電信「回A」,集團亦調整派股政策,會喺「回A」後3年內,將派息比率調高至70%,同埋明年起派中期息。中電信股價今日大升係咪因爲呢啲消息?

龍源年初向內地一家叫平庄能源嘅公司發A股,變相合拼食咗呢間公司,又收購母公司中國能源投資嘅項目,以配合國家新能源發展,邁向AH股之路。

康希諾今日有利好消息,刺激股價大升,但其後突然中途停牌,停牌前升逾10%,報408元,康希諾A股就一度漲停板。