膠戰

膠戰

集數

一班膠人,望落人模人樣,實情骨子裡充滿唔同動物嘅基因:有人情願唔做人要做蚊,為嘅只係想同「佢」親近;有人望落扮晒蟹咁款,原來身手敏捷仲唔覺意開發埋潛藏技能;有人變身做倉鼠之後,先知自己原來係一個文盲。

四個麻甩仔,相約喺擂台進行男人嘅決戰。以為牛高馬大肯定著數? 其實身手敏捷先係王道! 就算唔夠噸位同人搏拳,或者唔夠功力入人中路,只要仲有對腳喺度,就可以憑住超卓嘅走佬技術,避開對手嘅步步進逼。

六位膠人執到個Look四四正正,皆因佢哋要參加ViuTV慈善啤王大賽─一個唔考賭術,淨考智慧嘅比賽! 佢哋唔單止要了解成員之間嘅強項同弱項,仲要考佢哋嘅眼光,揀出接受挑戰嘅人,而且要識得喺關鍵時刻發動功能,成為支配大賽勝負嘅強者!

喺群畜亂舞嘅ViuTV總部,有一班人稱「玩膠六人組」嘅社畜,當人人努力開工,佢哋就由返工玩到收工。為咗改善企業風氣,提升社畜嘅內涵,ViuTV專誠請嚟一位形象百變嘅神秘成員,嚴格監督員工嘅表現。

一班社畜玩到個辦公室仲亂過打十號波,激到公司嘅掃地阿哥生蝦咁跳,勒令佢哋要執番自己啲手尾。但係呢班膠人,就算清場都可以玩出一個新角度,仲可以秉承一貫奸茅嘅作風互相競技…而一路都狗咬狗骨嘅六位成員,經歷多次嘅對壘,終於迎嚟第一次嘅合體。

幾經辛苦完成第一個挑戰嘅六位膠人,面對製作組畀佢哋嘅挑戰,睇落好似應付得游刃有餘,但講到考默契,一向互相攻擊嘅佢哋,又可以一齊走到幾遠? 而合作過後,大家都要面對殘酷嘅懲罰,當有得畀佢哋選擇承擔幾多嘅時候,佢哋會揀個人主義,定係團隊至上?

新年新開始,六位膠人相約喺野外,同陽光玩一場另類嘅遊戲! 同樣係踢波,人哋喺草地踢,佢哋就要跣住嚟踢;人哋玩冰壺,佢哋就將自己變埋冰壺滑出賽道。

六位膠人齊齊著住校服,走入校園玩轉學校! 兩位女王由收兵揀卒開始,已經上演連場心理戰,將四個小鹿亂撞嘅男仔玩到氹氹轉。

天下之大無奇不有,而喺膠戰嘅世界裡面,就有一個身體構造奇特嘅阿媽,連生三胎都係孖胎。雖然呢班孖仔孖女唔係好似樣,但係感情非常和睦:夜晚一定要大被同眠攬住齊齊瞓,如果唔係就情願去到天光都唔瞓;朝早起身,佢哋就一定會約埋一齊做醒腦提神嘅運動..

一種不明嘅喪屍病毒肆虐全港,喺全城接近淪陷之際,六個從險境逃脫嘅生還者收到消息,ViuTV總部仲未畀喪屍攻陷,於是佢哋決定到ViuTV總部暫避。

六位膠人以為走入ViuTV總部,就可以避開喪屍病毒,點知裡面竟然有隻喪屍王喺度,每晚仲會見人就咬。六個生還者裡面,有人變喪屍,亦有人安全無事。佢哋仲決定團結一致,用謀略對抗喪屍王。但當逃生門一開啟,佢哋會選擇並肩同行,定係大難臨頭各自飛呢?

六位「生啤救援隊」嘅要員,根據唔同線報,尋找被綁架嘅生啤嘅下落。佢哋唔止要跑長命斜同跨越大海,仲要借助市民嘅一臂之力完成任務蒐集情報,更重要嘅係要同時間競賽,鬥快拯救到生啤。